O CITEEC, a Escola de Arquitectura e a Facultade de Ciencias da Educación da Universidade da Coruña acollerán do 9 ao 11 de setembro de 2026 o “V International Meeting on Environmental Psychology and Urban Studies”, un evento que reúne a investigadores da UDC e de prestixiosas institucións chinesas coma as universidades de Tongji, Huazhong e Wuhan para deseñar proxectos conxuntos en neuroarquitectura, espazos terapéuticos e adaptación climática.
O encontro está organizado conxuntamente polo Grupo de Investigación Persoa-Ambiente e o CITEEC (Centro de Innovación Tecnolóxica en Edificación e Enxeñería Civil). Conta ademais co patrocinio da Vicerreitoría de Investigación e Transferencia da UDC e de GADISA, así como coa colaboración activa da rede internacional IAPS – Sustainability Network, o Centro de Formación PRAXIS e o Instituto de Estudos e Investigacións Psicosociais “Xoán Vicente Viqueira”.