A Escola Técnica Superior de Arquitectura da Coruña incorpora a metodoloxía da Axenda Urbana Española na formación de futuros arquitectos. Xa se publicaron os primeiros traballos desenvolvidos polo alumnado da materia Actuacións Urbanísticas Contemporáneas que imparte a profesora Maricarmen Tapia, centrados no Campus Elviña-Zapateira da Universidade da Coruña.
A través da análise deste ámbito universitario de 49 hectáreas, o estudantado elaborou propostas urbanísticas para afrontar os principais retos e oportunidades do campus, aplicando os obxectivos e principios da Axenda Urbana Española.
A iniciativa, desenvolvida en colaboración coa Vicerreitoría de Infraestruturas e Sustentabilidade da UDC, reforza a conexión entre a docencia, a investigación e a xestión do territorio, favorecendo a transferencia de coñecemento desde as aulas cara á mellora dos espazos universitarios.