O profesor da Escola Fernando Agrasar participará no ciclo «Arquitectura, ciudad y democracia a debate en los años 70. El Grupo 2C y sus relaciones internacionales», que reunirá en Barcelona os días 17 e 18 de marzo a especialistas internacionais para analizar como, a través do Grupo 2C e da figura de Aldo Rossi, se articularon novas maneiras de pensar a cidade, o espazo público e a cultura arquitectónica na España da Transición.
Organizado por Marisa García Vergara, Antonio Pizza e Paolo Sustersic, o programa está dirixido tanto ao público xeral interesado na cidade e a cultura como a estudantes, investigadores e profesionais da arquitectura, o urbanismo e as humanidades. O obxectivo é abrir un espazo de debate sobre a relación entre proxectos arquitectónicos, transformacións urbanas e aspiracións democráticas nos anos setenta, a partir de casos concretos e das redes intelectuais que os fixeron posibles.
