Os vindeiros días 11 e 12 de marzo realizarase o simposio “Enraizar: de Alvar Aalto a Álvaro Siza”, organizado por Eduardo Fernandes (EAADUM) e Pedro Borges de Araújo (IF-FLUP) e coa participación do profesor da ETSAC Antonio Río. Este simposio céntrase na proximidade formal e metodolóxica de Álvaro Siza con Alvar Aalto, tal como recoñece o arquitecto portugués en varios textos e entrevistas.
O primeiro día será en Oporto, entre as 10 e as 18 horas, na Sede da Fundación Marques da Silva. Ao día seguinte, a actividade continúa en Guimarães, no Edificio de Arquitectura do Campus Azurém da Universidade do Minho, entre as 10 e as 18 horas. A asistencia é gratuíta e aberta ao público ata completar aforo.
