O profesor da ETSAC Óscar Pedrós obtivo co seu estudo Costas + Pedrós o premio AMAD ó mellor proxecto de interiorismo 2024 polo seu proxecto de reforma da sede da Autoridade Portuaria da Coruña.
O xurado recoñeceu a creación dun espazo fluído, coa madeira como protagonista, en diálogo co resto dos materiais do edificio. As formas ondulantes, a textura e a cor do carballo achega calidez a un espazo descarnado, case industrial. A madeira dá relevo a ese espazo axial ou longo corredor de comunicación entre estancias.
Os Premios AMAD Arquitectura de Excelencia en Madeira recoñecen os proxectos de arquitectura, rehabilitación ou interiorismo que destacan polo seu innovador uso da madeira, material natural e sostible. Estes galardóns son o escaparate perfecto para poñer en valor a creatividade e a capacidade da madeira para construír contornas máis saudables e sostibles.
