A alcaldesa, Inés Rey, presentou a Semana da Arquitectura 2020, en que se realizarán charlas, visitas guiadas e rutas pola obra de Andrés Fernández-Albalat, recentemente falecido e “o gran construtor da imaxe urbana da Coruña”, segundo o definiu a rexedora. Rey sinalou que con esta actividade o concello salda unha débeda con este referente que soñou unha imaxe urbana da Coruña e coa disciplina, xa que unha cidade que forma arquitectos non pode vivir de costas a súa escola de arquitectura: “Esta Semana da Arquitectura 2020 só pode ser o primeiro paso dunha intensa colaboración entre o concello e a escola”. Precisamente, esta será unha das sedes en que se desenvolverá o programa xunto á Fundación Luis Seoane e ao Colexio de Arquitectos de Galicia, “institucións que estiveron vinculadas a Albalat. A escola como profesor, o colexio como decano e súa relación coa fundación proveñen dese triángulo prodixioso que formaban Seoane, Díaz Pardo e Albalat, defensores da cultura galega en épocas escuras”.
A semana da arquitectura comezará este xoves na sesión plenaria coa declaración de Andrés Fernández-Albalat como Fillo Predilecto da cidade, por proposta da Escola de Arquitectura, do Colexio de Arquitectos e do propio concello e co voto unánime da corporación na Comisión de Honras e Distincións. Deste xeito, iniciarase unha programación, que incluirá visitas ao edificio de Begano, ao concesionario da SEAT, ao Centro de Cálculo de Abanca e ao Colexio Escolapios; percorridos pola obra de Albalat desde a praza de Pontevedra á Fundación Luis Seoane, a mostra antes comentada e charlas sobre a figura de Albalat na Fundación Luis Seoane, en que participarán personalidades e compañeiros seus coma Manuel Gallego, César Portela, Patxi Mangado, Javier Harguindey ou Cristóbal Crespo, así como os profesores organizadores desta semana, Antonio S. Río e Carlos Quintáns.
O concelleiro de Urbanismo, Juan Díaz Villoslada, remarcou a importancia de pór en valor a figura de Fernández-Albalat que se adiantou aos tempos e pensou na planificación dunha gran área metropolitana, “unha cuestión que hoxe se confirma como esencial para avanzarmos como territorio”.
As persoas interesadas en asistiren ás visitas guiadas e aos roteiros pola cidade deberán enviar un correo electrónico a semanaarquitectura2020@coruna.es. A praza confirmaráselles vía mail, onde se lles informará das medidas adoptadas en cada cita pola Covid-19. No caso das charlas, a inscrición realizarase a través da web da Fundación Luis Seoane.
Programa da Semana da Arquitectura
