Calendar

A Fundación Barrié presenta na súa sede de A Coruña a exposición Compañeiros de oficio, unha reflexión sobre o papel que a arquitectura vernácula exerceu na obra de grandes mestres da arquitectura contemporánea.

A mostra, produción propia da Fundación e comisariada por Pedro de Llano, catedrático de Representación e Teoría Arquitectónica da Escola Técnica Superior de Arquitectura da Universidade da Coruña, pretende impulsar unha reflexión pouco habitual sobre o papel da arquitectura vernácula como pilar fundamental da obra dun imprescindible grupo de arquitectos contemporáneos que deron continuidade ao vínculo entre os “artesáns” de onte e os “creadores” de hoxe, tal e como expresou, Le Corbusier, coas palabras que dan título a esta exposición.

Poucos municipios de Galicia conservan unha pegada patrimonial medieval, e máis concretamente románica, tan interesante como o Concello de Arteixo. As igrexas conservadas proceden nalgúns casos de vellos mosteiros mentres outras son igrexas rurais, con numerosos restos do período románico, como ábsidas, fachadas, muros laterais, canecillos, xanelas e portadas. Épocas de prosperidade ou a simple necesidade de reparación, modificaron séculos despois o seu aspecto orixinal, sen que con eles perdesen o interese e o valor arquitectónico que tratamos de resaltar nesta mostra.

Coa colaboración do Concello de Arteixo e da Deputación Provincial da Coruña, o Departamento de Composición presenta esta montaxe expositiva, realizado por estudantes da ETSA, Doutoramento e Máster do Departamento, baixo a dirección dos profesores da Materia de Historia da arte.